പുതിയ കഥാസമാഹാരം “രയറൊം കഥകള്‍ " VPP ലഭിയ്ക്കാന്‍ sidrapubications@gmail

Tuesday 28 June 2011

കൂരാച്ചുണ്ട് കഥകള്‍ - 8 : “ലോക്കപ്പില്‍“

സന്ധ്യയാകുന്നു. ഞാനും അച്ചായനും രയറോത്ത് വര്‍ത്തമാനം പറഞ്ഞുകൊണ്ടു നില്‍ക്കുകയായിരുന്നു. അപ്പുറം പുഴക്കരയില്‍ ചെറിയ അനക്കങ്ങള്‍ കേള്‍ക്കുന്നുണ്ട്. പള്ളിയില്‍ നിന്നു ബാങ്കുവിളിയ്ക്കുന്നു. അപ്പോഴാണ് പാലം കടന്ന് നീലജീപ്പ് പാഞ്ഞുവന്നു ബ്രേക്കിട്ടതും ചടപടാന്ന് നാലഞ്ചു പോലീസുകാര്‍ ചാടിയിറങ്ങിയതും. ഇറങ്ങിയ പാടെ അവര്‍ പുഴക്കരയിലേയ്ക്ക് ഓടി. ഞങ്ങളെല്ലാം അന്തം വിട്ടുനില്‍ക്കെ പുഴക്കരയിലെ കാട്ടുവള്ളിക്കൂട്ടത്തില്‍ കൂടി ആരൊക്കെയോ ഓടുന്നതും ചാടുന്നതും കേട്ടു. അല്പസമയത്തിനകം വാറ്റുകാരന്‍ കുഞ്ഞാപ്പനെയും കുഞ്ഞൌതയേയും കൈക്കു കൂട്ടിപ്പിടിച്ച് പോലീസുകാര്‍ കൊണ്ടുവരുന്നതു കണ്ടു. കൈയില്‍ ഒരു കന്നാസും. പുതിയ എസ്സൈ ആളൊരു മുറ്റനാണ്. പിടിയ്ക്കും എന്നു വെച്ചാല്‍ പിടിച്ചിരിയ്ക്കും. കുഞ്ഞാപ്പനെയും കുഞ്ഞൌതയേയും വണ്ടിയിലേയ്ക്ക് തള്ളിക്കയറ്റിയിട്ട് പോലീസ് ആലക്കോടിനു പോയി.

“ഇന്നവന്മാരുടെ കാര്യം പോക്കാ..” ഞാന്‍ അച്ചായനോട് പറഞ്ഞു.

“നല്ല ധൈര്യത്തില്‍ നിന്നാ കുഴപ്പമൊന്നുമില്ല..” അച്ചായന്‍ ഈസിയാക്കി എന്നോട് പറഞ്ഞു.

“എന്തു ധൈര്യം..? മാക്രി പാണ്ടിലോറിയ്ക്ക് മസിലുപിടിച്ചമാതിരിയുണ്ടാകും. പോലീസുകാര് ഇടിച്ച് ഇഞ്ചപ്പരുവമാക്കും..”

“പണ്ടു കൂരാച്ചുണ്ടില്‍ വെച്ച് എന്നേം വേറെ മൂന്നുപേരേം പോലീസൊന്നു പൊക്കിയതാ...ചീട്ടുകളിച്ചേന്..”

“എന്നിട്ടോ..?”

“എന്നിട്ടെന്താ.. ഒരു ദിവസം അകത്തു കിടന്നു. എന്നോട് മാത്രം പോലീസ് നല്ല ഡീസന്റായിരുന്നു..”

“എന്തു ഡീസന്റ് ?”

“എടാ കൊച്ചേ സ്റ്റേഷനില്‍ കൊണ്ടു പോയാ ആദ്യത്തെ പരിപാടിയെന്താ..? മുണ്ടഴിപ്പിയ്ക്കും. മറ്റേ മൂന്നവന്മാരുടേം മുണ്ടഴിപ്പിച്ചാ അകത്തിട്ടത്. എന്നോട് മാത്രം ഉടുത്തോളാന്‍ പറഞ്ഞു..”

“ആഹാ അച്ചായനെ എസ്സൈയ്ക്കു പരിചയം കാണും അല്ലേ..?”

“ഏയ് പരിചയമൊന്നുമില്ല. ചെന്നപാടെ എല്ലാവനോടും മുണ്ടഴിയ്ക്കാന്‍ പറഞ്ഞു. മറ്റവന്മാര്‍ അഴിച്ചു. എന്നാല്‍ ഞാന്‍ നല്ല ധൈര്യത്തിലങ്ങു നിന്നു. അന്നേരം എസ്സൈ “അഴിയ്ക്കെടാ റാസ്കല്‍” എന്നും പറഞ്ഞ് എന്നെ തല്ലാനൊരു ചാട്ടം. ഞാനഴിച്ചതും “ഫാ ഉടുക്കെടാ റാസ്കല്‍” എന്നും പറഞ്ഞ് പുറകോട്ടു ചാടിയതും ഒരേസമയത്ത്. ഞാനന്ന് മുണ്ടുടുത്തിട്ടു തന്നെയാ അകത്തു കിടന്നത്..”

“ഒരു സാധനം വാങ്ങീട്ടു വരാം.” ഞാന്‍ രവിച്ചേട്ടന്റെ കടയിലേയ്ക്കു നടന്നു.

6 comments:

  1. ഈ അച്ചായന്‍ കഥകളും ഒരു ബുക്ക് ആവുമോ.. എന്തായാലും ആളൊരു പുലി തന്നെ :-)

    ReplyDelete
  2. ഈ വെടി അച്ചായന്‍ കൊള്ളാലോ..

    ReplyDelete
  3. അച്ചായന്‍ കൊള്ളാം, ഇതിന്റെ വകഭേദം കേട്ടിട്ടുണ്ട്!

    ReplyDelete
  4. അസ്സല്‍ അച്ചായന്‍.

    ReplyDelete
  5. [co="red"]Type Text here[/co]

    ReplyDelete

കമന്റിലെ അക്ഷരങ്ങള്‍ക്ക് നിറം നല്‍കാന്‍ [co="red"]Type Text here[/co] . ഇവിടെ red എന്നതിനു പകരം മറ്റ് നിറങ്ങള്‍ നല്‍കിയാല്‍ മതിയാകും.